家長爆兒童填色賽：5000蚊開戶先有證書

【明報專訊】本報前日報道話，市面有機構舉辦免費兒童繪畫比賽，但得獎者就要自掏腰包買獎狀或參賽證明。呢單新聞引起唔少人討論，Emily噚日就聽到有聽眾喺港台節目《瘋Show快活人》發表意見，最特別嘅個案係，有家長話囡囡參加咗某銀行嘅填色比賽，表格由學校派發，之後有銀行職員打電話叫佢去攞證書，但條件係要攞5000蚊喺銀行開戶口。亦有聽眾話，有好多比賽係教育機構主辦，小朋友要畀幾千蚊報名上訓練班，機構會包埋獎盃、證書，報名費佔咗300幾蚊。


有比賽頒參與「獎牌」 人人有份

點樣對待呢類比賽，真係各有各做法，有家長就話囡囡參加小學團體舞蹈比賽，明明得獎，但係要攞到獎盃就要額外畀200蚊，佢就決定唔畀喇。有聽眾就話阿仔參加咗朗誦比賽，淨係要畀報名費，贏咗當然有獎，參與嘅同學亦都獲得一個刻有「欣賞你的努力」嘅參與「獎牌」，佢就認為呢個做法幾好，因為可以令到同學仔有自信心，輸咗都有肯定咁話。