終院新網站啟用

【明報專訊】終審法院唔係時時開庭，即使開庭市民只能夠到法庭旁聽，普通人根本無可能走入法院大樓內睇吓，不過，終審法院開咗個新網站，將終院大樓內大部分非公共區域「大公開」，連首席法官馬道立、3個常任法官嘅辦公室，同埋法官休息室都公開埋，但相中就搵唔到幾個大法官嘅身影。仲有呢座古蹟大樓內鬼咁靚嘅舊設施如水池同樓梯，仲有仲有……嚟緊有咩審訊亦一click見到，真係好睇又好用。


新網站分為4個主要部分，包括「終審法院的工作」、「關於終審法院」、「參觀終審法院」及「文件」。除咗可以瀏覽最新同過往嘅判辭、查詢未來幾個月有咩聆訊同邊個審，連過往由終院法官喺不同場合講過嘅演辭，例如首席法官馬道立喺今年法律年嘅演辭，都可以睇到。此外，網站詳細介紹終審法院嘅法律程序、落成歷史同參觀須知等，連法庭平面圖都有，有助市民對法院有更深認識（網址﹕www.hkcfa.hk/tc/home/index.html）。