最大移動馬戲棚港架起

【明報專訊】馬會慶祝130周年嘅活動浪接浪，馬會早前搵嚟加拿大嘅大型馬術匯演Cavalia來港表演，本月31日舉行首場公演。噚日Emily見證住全世界最大嘅移動馬戲棚喺中環新海濱架起，10層樓高嘅馬戲棚用咗約10分鐘就吊起。「Cavalia村」仲包括另外8個帳篷，用作馬房、熱身區同職員餐廳等。


可抵150公里烈風 曾歷暴風雪

噚日海旁都好大風，吹到帳篷頂嘅旗左搖右擺，劇團創辦人兼藝術總監Normand Latourelle就拍晒心口話，帳篷抵得住時速150公里嘅烈風，曾經喺加拿大經歷過暴風雪都安然無恙，香港嘅風可謂濕濕碎。之前歐陸嘉年華同有關部門處理牌照問題搞到延遲開幕，Normand就話相關牌照初步已批出。


已賣2萬飛 加開11場

Cavalia巨型白色馬戲棚面積超過2440平方米，可容納2004名觀眾及長50米乘20米嘅舞台，畀馬自由奔跑。Normand話表演現場感十足，最前排觀眾距離舞台上嘅馬唔夠兩米。佢之前已經同Emily講過會有6匹來自法國嘅駿馬首次亮相，今次仲透露完場一幕，舞台會喺分半鐘內注入30萬公升水，馬兒會喺上面自由奔騰表演，至於詳情係點就要入場睇。


主辦單位話反應熱烈，已經賣咗超過2萬張飛，宣布加開11場至4月26日，門票現於Cavalia官方網站同快達票有售。