民協被爆竊 損失2000蚊

【明報專訊】賊人偷錢偷到政黨頭上。民協職員前日朝早返工時，發現位於油麻地彌敦道469號新光商業大廈11樓嘅民協總部被人爆竊，個窗撬開咗，櫃桶畀人搞過，經點算後損失咗2000蚊現金，好在冇其他損失。民協副主席譚國僑就話，農曆正月被爆竊都好無奈，唯有寄望係「破財擋災」，經此一役民協可以有更好嘅一年。


新光商業大廈呢排做緊維修工程，外牆搭起竹棚，結果唔止民協遇到樑上君子，大廈仲有6個單位都被爆竊。譚國僑懷疑賊人係爬上竹棚然後破窗入屋，好在行政部一向冇乜現金，被偷嘅只係一啲活動收嘅錢，同埋有啲職員嘅利市錢。佢呼籲所有喺大廈做外牆工程嘅市民同埋承建商都要提高警覺，唔好畀賊人有機可乘，並希望警方加強巡查呢啲正在維修嘅大廈，防止罪案發生。