自製咪兜訪人代

【明報專訊】北京兩會期間，香港記者成日都要喺人代政協入住嘅酒店大堂，等一眾代表「扑咪」做訪問，由早餐等到夜晚收工，其實都幾辛苦，有時太多傳媒一齊採訪，都會搞到有啲混亂。噚日就有電視台行家用攝影機嘅三角腳架自製「咪兜」（擺放咪高峰嘅腳架），再將各大傳媒嘅咪牌掛晒上去，等各受訪者行埋嚟就可以做訪問，記者亦唔使長時間拎住支咪咁重咁辛苦，呢個咪兜仲可以調校高度，配合受訪者身高。而噚日人大代表葉國謙要回應反水貨客活動，就係第一個使用者喇。


（何曉勤攝）