禮賓府周日開放 網民話要去「賞杜鵑」

【明報專訊】禮賓府將於嚟緊周日（3月15日）開放，畀市民入內觀賞花卉樹木，以及參觀特首喺禮賓府舉行官式活動同接待賓客嘅地方，政府發言人仲話會安排香港警察樂隊同學生樂團喺花園表演。不過，有網民得悉禮賓府開放，就已經喺社交網站話當日唔使去「光復行動」或者「鳩嗚」，因為有「正經事」要辦，就係去「賞杜鵑」同「散步」。


警察樂隊學生樂團表演

政府噚日宣布禮賓府周日上午10點至下午5點向公眾開放，當日會有導賞員在場向市民介紹禮賓府嘅歷史同建築特色，預計當日參觀者眾多，會視乎輪候人數，喺下午5點前截止輪候，確保所有等候入場嘅人都可以入內。禮賓府上年開放日，參觀人次超過1.3萬。


有網民就建議當日去「賞杜鵑」，仲有人估計當日應該會有內地遊客參觀，建議到時可以搞個「攝影比賽」，影吓內地客參觀時嘅行為「奇景」。