新聞類別
副刊
詳情#
【明報專訊】香港電台長壽節目《城市論壇》即將踏入35周年，節目監製兼主持人謝志峰透露下月會有慶祝活動，準備邀請曾經出席30周年紀念活動嘅特首梁振英同政務司長林鄭月娥出席慶祝。不過，謝志峰估計請到兩人嘅機會渺茫，皆因今時唔同往日，當年梁振英同林太分別係行政會議召集人同發展局長，相對易請；但謝志峰都希望佢哋可以出席，「如果嚟到，當然歡迎啦」。
《城市論壇》噚日邀請自由黨鍾國斌同公民黨梁家傑等立法會議員出席討論政改，鍾國斌離場時拎住把藍色雨傘，佢話係港台送畀佢嘅紀念品。
謝志峰「忍痛放棄」送黃遮
呢個時候送雨傘，唔係黃色係藍色，唔知有乜嘢特別意思？謝志峰就話多年嚟都有送遮畀嘉賓嘅習慣，因為論壇喺露天場地舉行，有時遇上落雨天，嘉賓都可以有遮用。謝志峰笑笑口話，今次訂遮時都諗過做黃色，但因為隻黃色係偏向「鴨屎」黃，同大家想像嘅鮮黃色有出入，所以唯有「忍痛放棄」，用色調校好嘅藍色。
回應 (0)
