宣傳片走入監房 懲署13分鐘唱好自己

【明報專訊】紀律部隊呢期都鍾意拍宣傳片，自我讚賞一下部門嘅工作，而懲教署亦推出咗一段長達13分42秒嘅宣傳片，題為「同一樣的使命，非一般的任務」，帶大家走入監房。短片話懲教署結合「懲」與「教」兩種不同概念，話裏面有唔少人性化一面，例如有無煙懲教設施、環保廚餘設施，有獄友申訴渠道，仲會有營養師制訂營養均衡嘅餐單，並獲衛生署認可，講到服務好好咁。


宣傳片介紹唔少更生服務，拍吓獄友學燒焊、紮鐵等，又有體育教練喺攀石牆前指導一群年輕在囚者攀石。亦有兩句更生人士自述，讚賞懲教人員點好，「起初，我以為他們是來管我，但幸好他們幫了我很多」。有興趣嘅可瀏覽睇片（www.csd.gov.hk/tc_chi/mmc/mmc_video/pub_video.html）。


懲教署各院所家總收容額超逾1.1萬人。懲教署都會因應需要招聘人手，懲教主任受訓期26星期，懲教助理則要23星期。