民記酒會豪送平板電腦

【明報專訊】民建聯、經民聯先後喺北京舉辦酒會，宴請喺北京開緊兩會嘅人大代表、政協委員，以及曾經處理港澳事務嘅內地官員。民建聯前晚喺北京芳草地酒店搞晚宴，唔少退休京官現身，每年呢個酒會，出席者可以話又食又拎，今年出席者可獲一部平板電腦同一盒鳳梨酥。


雖然民建聯的確有錢，但咁大手筆嘅其實係僑福芳草地老闆、僑福集團主席黃建華，據聞部平板電腦裏面有唔少短片，包括有介紹黃老闆啲收藏品。另外，有政協委員透露，民建聯主席譚耀宗席間大講笑話，形容老婆係美女，今年美女唔上京相信係要放佢一馬。早前有傳譚耀宗可以升呢做政協常委，但最終兩會有呢個議程，譚sir席間叫大家幫手收吓風，然後同佢講吓有咩消息。


噚日輪到經民聯喺芳草地搞酒會，但地點係商場裏面一間由經民聯監事會主席林建岳開嘅高級餐館，現場同樣冠蓋雲集，好似中聯辦副主任殷曉靜、全國港澳研究會會長陳佐洱等都有出席。經民聯立法會議員梁美芬雖然唔係全國政協委員，亦特登飛上北京出席活動招呼客人。而特首梁振英都好畀面，去完經民聯嘅酒會，先搭最夜一班機返香港。