破天荒微信收集問題

【明報專訊】家資訊科技發展一日千里，好似科網巨人騰訊（0700）主席馬化騰噚日喺北京開記者會，就別開生面咁利用微信嚟收集問題，諗住可以更容易交換資訊，不過記者一見馬生就拋諸腦後，企晒起身爭住問問題。


記者會現場相當墟冚，主持人請記者開微信，「各位，我們來一個面對面建群，輸入0304進入」。入群記者數目幾分鐘內達到100的群組人數上限，進入後現場突然安靜，所有記者都低頭把問題輸入群組，主持人亦隨即把新聞稿放到群內。不過馬化騰一入會場之後，呢個高科技畫面即刻煙消雲散。


適逢今個農曆新年微信紅包喺內地大熱，有記者問馬生自己派咗幾多微信紅包。馬生停一停諗一諗，話紅包主要派畀同事，短短個零星期，竟然派咗二十幾萬人仔！