馮華健坐住輪椅赴政協

【明報專訊】Emily早前提過，今年中央官員特別提醒出席兩會會議嘅港區人大代表同政協委員，盡量要出席所有會議，唔好請假、偷懶等，呢兩日政協已經到咗北京，Emily噚日見到政協馮華健坐住輪椅、戴住腳套咁上北京開會（圖），真係負責任同勤力嘞。


滑雪筋腱撕裂

馮華健同Emily講，佢聖誕時滑雪整傷腳，但當時仍行得走得，點知3個星期後先發作，原來係腳踭筋腱撕裂，行路都痛，唯有坐輪椅，希望3月底可以行得番。Emily祝佢早日康復。


今年部委唔可以請委員食飯，亦要響應節儉，喺香港做過外交部駐港特派員、現時係政協發言人嘅呂新華，噚日就去到香港政協委員入住嘅酒店，飲住清茶咁同人傾偈敘舊，相信都係要配合國策。呂新華亦不在其位不謀其政，噚日記者問佢有關香港政改、中港矛盾等問題，佢以自己離開香港3年、唔識答香港事等方法回應記者。