林鄭派傳單惹做媒猜疑

【明報專訊】政務司長林鄭月娥噚日落咗去將軍澳同觀塘派傳單推銷政改，其中一站係酒樓，點知撞正民主黨立法會議員胡志偉訂咗兩圍枱「開年」。形容「野生捕獲」林鄭嘅胡志偉唔放過請願機會，話要求真普選，有議員辦事處職員即刻舉黃傘，胡志偉仲咁啱有個「爛蘋果」道具喺身，想送畀林鄭，林鄭就唔收。


胡志偉話突然好多長者

胡志偉又同Emily講，林鄭未上嚟前，酒樓有好多圍枱空置，畀人訂咗，冇幾耐就有好多婆婆伯伯到，情况同氣氛都有別於平常。


有坐近門口嘅市民阿Sa就同Emily報料，話中午一坐低就見到好多阿婆師奶坐滿十幾張枱，唔少人仲有自拍神棍喺身，無幾耐就見到有人舞獅，然後就係林鄭同劉江華等人走嚟逐枱派單張同傾偈，懷疑好似一早有人安排做媒咁。


官員話林鄭近期玩突襲

不過，有官員就同Emily講，林鄭近期係玩突襲落區，事前冇通知政府以外嘅人同團體，只係事前派人同酒樓打過招呼，講會有嘉賓到，但冇提林鄭個名，而林鄭落區好受歡迎，好多人爭住同佢影相，唔知係咪咁樣先被人以為有做媒。