人力瞄準疑轉軚議員打小人

【明報專訊】政改第二階段諮詢本周完結，人民力量話趁周五驚蟄，會喺周六去旺角西洋菜街「打小人」。「慢必」陳志全笑住話，打小人唔係想「詛咒」疑似會轉軚嘅議員，而係「加持」，因為只係想「揼實」佢哋，等佢哋唔好「轉軚」。


至於選舉策略，人民力量話如果有泛民議員轉軚支持唔合乎國際標準嘅政改方案，將會啟動「票債票償」運動，喺11月區議會選舉派員狙擊。人力原本打算派20幾人參選下屆區會，但若要搞「票債票償」，就要空群而出派人參選。


人力議員陳偉業（大嚿）話，泛民一向嘅舊傳統，係現任議員喺當區做工作，通常都唔會突然派人挑戰，但今屆泛民唔知會唔會打破傳統。如果有泛民議員去選人力一向工作開嘅區選席位，又無知會人力，唔排除人力會有「新態度」喎。