邊個先挑釁？高達斌梁金成互斥

【明報專訊】反水貨客團體前日發起「光復元朗」遊行，最終演變成警民衝突。北區水貨客關注組發言人梁金成噚日喺港台《千禧年代》話，衝突係因為「愛字頭」挑釁，好似「愛港之聲」主席高達斌，就聯同佢嘅支持者不斷指罵遊行者，又混入遊行隊伍。高達斌透過電話回應，話前日無用愛港之聲旗號現身，仲戴晒口罩，希望「微服」喺現場觀察同攝錄，反指示威者對佢動粗。


高達斌仲話，無喺遊行現場見過梁金成，強調無混入遊行隊伍，只係拍低現場情况以將證據交畀警方，話自己一度被刺激性噴霧噴中雙眼。


十八鄉鄉委會主席梁福元話衝突同村民無關，仲話早就取消咗動員村民嘅10幾架旅遊巴，「鄉親出去預咗打交，畀我哋勸退咗……元朗有成百幾條村、10幾萬村民；如果有事，唔使10分鐘就有幾萬人出去」，又話有村民未知消息，所以佢前日就喺鄉公所，用茶點汽水招呼啲村民，等佢哋食完餅就返屋企。


元朗人批梁福元「掩耳盜鈴」

而對於梁福元話水貨客唔影響元朗居民，聽眾林小姐就話，梁唔代表元朗全部居民，仲反問「你成日匿埋喺條村，見到啲乜」；另一元朗居民黃小姐就話家去藥房買嘢，買得少會被職員歧視，質疑梁福元「掩耳盜鈴」。