答錯公屋落成量 王國興老貓燒鬚

【明報專訊】立法會噚日舉行新春午宴，秘書處諗咗個「過四關」遊戲，等官員同立法會議員比併一下，測試大家對唔同議題數字嘅嘅熟悉程度。官員或議員要先答啱問題，先可以過一關，或者將對方「過關」徽號拎走。議員隊抽中由民建聯鍾樹根、工聯會王國興同商界議員廖長江出戰，點知王國興身為房屋事務委員會主席，居然「老貓燒鬚」，答錯今年度公屋落成量，真係要好好檢討。


兩隊似拉布 官員隊勝出

雙方都好似喺拉布時咁，互不相讓。答啱問題一方，寧願將對方「過關」嘅徽號拆番走，都唔肯過另一關。結果，答咗近10條題目，雙方依然過唔到四關。政府徽號較多，所以立法會主席曾鈺成判官員隊勝出。


官員隊都贏得好險，其中問到全港提供Wi-Fi政府場地數目，行政會議成員張志剛、海關關長張雲正、勞工處長唐智強組成嘅官員隊都唔識答，要用錦囊問台下嘅商經局長蘇錦樑，好彩蘇局長憑記憶中3年前嘅數字推算，都估得中。勞工處長唐智強亦答啱勞動人口。


活動中與特首梁振英同枱嘅民建聯葛珮帆話，問過CY點解去完馬爾代夫塊面咁黑，對方話頭3日都有搽防曬，但發覺一啲都唔黑，於是之後就無查。佢仲引述CY話，去馬爾代夫旅行無通知當地中國大使，但臨走前大使都有搵佢見面。