經民聯送cream祝福麒麟臂消失

【明報專訊】近日唔少政黨都舉辦新春團拜，噚日就到有7個議員嘅經民聯，經民聯仲準備咗潤唇膏同手霜畀記者做新年禮物，上面貼有祝福字句，好似「要咩有咩」、「袋住先，食住上」，不過大家最關注嘅，都係「食極唔肥，麒麟（臂）消失」，可見今年雖然係羊年，但係似乎麒麟先係吉祥物喎。


指樓市有不理性買賣

樓市高企不下，噚日金管局又再出招，經民聯當然都有評論吓，本身開證券行嘅金融服務界議員張華峰，預計一年之內樓市會大跌，特別係細單位，隨時會跌三四成，佢用股市作比喻，話當連「垃圾股」都有人爭住買時，可見股市已到盡頭，家樓市亦有類似勢頭，有好多唔理性買賣喎。相信想上車嘅無殼蝸牛，如果聽到張華峰咁講都會好想佢估得準。