馬恩國倡設《反港獨法》

【明報專訊】工聯會吳秋北早前建議將內地嘅《國家安全法》引入香港，外界反應麻麻，家就有個「同路人」出現喇。身兼監警會委員、中澳法學交流基金會主席嘅民建聯大律師馬恩國有新搞作，佢話4月1號會率領基金會成員訪京，同相關部門建議喺香港設立《反港獨法》，仲話約緊基本法委員會主任李飛同人大法工委副主任張榮順見面講解。


吳秋北有個「同路人」

Emily噚日喺中聯辦港島工作部新春酒會見到馬恩國，問到新年大計，佢就透露會上京建議中央喺香港設立《反港獨法》，把法例納入《基本法》第18條（即當中央宣布香港進入緊急狀態，可發布命令將全國性法律在香港實施）附件三，喺緊急時候就可以直接實施。


「要平衡言論自由」

家有人不時會高舉港英旗，被問到係咪旗都唔可以舉時，馬恩國就話，香港應該要有合理限制唔可以講「港獨」，但同時亦要平衡言論自由，所以要好小心研究。佢仲話條《反港獨法》會係「common law style（普通法特色）」。