譚耀宗料升政協常委

【明報專訊】人大政協兩會會議即將喺北京舉行，今年係呢屆政協嘅第三年，過去呢年都會出現「增補」，即係中央會邀請新人做政協委員，而一眾政協常委今日就會出發去北京出席常委會會議，審議增補名單。Emily收到風，本身已經做咗十幾年政協委員，係政協「社會和法制委員會」（專委會）副主任嘅民建聯主席譚耀宗，今次將會再上一層樓，「升呢」做政協常委。


早前內地省市常委被「褫奪」

譚耀宗話等有正式公布先再回應，又話如果認為佢適合嘅，佢會盡力、落力做喎。佢今日都會出發上京列席常委會會議。


其實專委會副主任呢個職位本身已享有常委待遇，包括可以列席常委會會議，但始終名分唔同，所以唔少政界中人都對政協常委嘅身分趨之若鶩。知情人士同Emily講，估計因為早前部分內地省市嘅政協常委被「褫奪」，所以出現空缺。民建聯過去咁堅實支持中央同特區政府，加上譚耀宗將卸任黨主席，或者因為咁，所以中央都將佢升呢，以示表揚。自由黨田北俊早前被褫奪政協委員一職，不過Emily聽聞今次增補就未必再有港人補上喇。