唐唐紫呔同財案無關

【明報專訊】財爺曾俊華日前喺facebook預先公開今年財政預算案用紫色封面，全國政協常委唐英年噚日就戴咗條紫色領呔出席中華總商會新春酒會，唔通係撐財爺份預算案？不過唐唐就話戴紫呔純屬偶然，而佢家已經係「一般市民」，對財爺嘅預算案都有期望，仲話自己同財爺共事多年，相信佢會量入為出喎！

財爺新開嘅facebook戶口，喺預算案公布前夕一度不見影，即引起種種猜測。財政司長發言人同Emily解釋，戶口一度被暫停（suspend），應該係同網站流量有關。發言人話，仲有好多人等緊同財爺喺facebook做朋友，佢哋正處理大量friend request，請大家有耐性等吓。