1969年《學苑》已論「港獨」？

【明報專訊】《學苑》之前被批支持港獨，全城關注，《學苑》前副總編陳雅明噚日喺facebook貼咗幾張文章舊相，話1969年時《學苑》已刊登過文章討論港獨，又話一向旗幟鮮明反對港獨嘅基本法委員會委員劉迺強，係當年《學苑》副老總，要感激佢帶頭論港獨咁話。


劉迺強支持港獨咁驚人？我哋向佢查詢，佢就大罵今日《學苑》嘅人唔識字，話當年刊登呢篇文章嘅原意，係因為當年正值文革，有唔少五花大綁嘅死屍由大陸順流而下，有啲人就想「港獨」，而篇文係反駁呢啲論點嘅，佢又批評陳雅明只引述幾句，但就無視成篇文章結論係反對港獨，強調文章最後一段總結係﹕「我們不要獨立。」


文章作者為「華秀」，劉迺強話自己唔係「華秀」，至於華秀係邊個，因為年代久遠，佢已經唔記得。


另外，當年《學苑》編輯部今日睇番都幾猛料，出版秘書係前政務司長許仕仁，總編輯係港大新聞及傳播研究中心總監陳婉瑩，真係唔講唔知。