陳健波新春願望 「泛民恢復正常」

【明報專訊】立法會無黨派議員組成嘅「六人組」噚日新春團拜，前財委會主席、金融界吳亮星（星爺）都有現身。按建制派協調，喺下個財政年度財委會主席一職本來會再輪到星爺出任，但佢上屆做主席時主持東北發展研究撥款搞到滿城風雨，令安排有變。星爺噚日就話做主席最緊要幫到手，堅持容許議員按《會議程序》第37A條提出多個議案嘅做法係錯嘅，話除非修改到議事規則，改番規矩做一名議員只能提出一個議案，否則佢做嚟都無意思。


波哥發言多 新花名「衝擊波」

星爺噚日同「六人組」召集人商界廖長江，成員保險界議員陳健波（波哥），建築、測量及都市規劃界議員謝偉銓，體育、演藝、文化及出版界馬逢國，同埋旅遊界議員姚思榮同讀者拜早年。波哥喺上個年度發言非常踴躍，被指係新一代重炮手。


馬逢國就幫波哥起咗個新花名叫「衝擊波」，比喻佢夠晒殺傷力。波哥被問到有咩新年願望，佢就話希望「泛民恢復正常」，唔好再黐埋激進派一齊拉布，睇嚟佢都幾配得上個新花名。


至於六人組嚟緊有咩新搞作，馬逢國就話六人組「自由過自由黨、民主過民主黨」喎！六人組家每星期定期都會坐低開吓會，嚟緊預算案亦會一齊搞聯合記者會。