民主黨晚宴暫10官出席

【明報專訊】民主黨今個星期五會搞20周年黨慶酒會同晚宴，早前政府消息話民主黨立法會議員何俊仁計劃發動辭職「公投」，而黨慶當晚又涉籌款，所以政府高層下指示，官員要全面杯葛。不過，黨慶籌款委員會主席李華明（Fred）噚日話，仍有10名官員心口掛個「勇」字應承赴會，而行會召集人林煥光、立法會主席曾鈺成、美國駐港總領事夏千福等，都已答允當晚會出席。


重申官員不涉籌款

10個出席官員中，除咗舊黨友運房局長張炳良、食衛局長高永文喺「禁制令」發出前答應赴會，其餘都係喺「禁制令」發出後才應允出席（見表）。阿Fred重申佢哋邀請官員出席嘅黨慶酒會不涉籌款，不存在官員幫民主黨籌款，而當晚嘅外銷宴席已全數售出，籌得60萬。雖然如此，民主黨上次辦黨慶有60多名高官出席，今次出席者明顯大縮水。


民主黨去年拍賣畫作發生小風波，今年佢哋就邀請到本地畫家史佰（Pat Stewart）同國畫大師何永祥捐出畫作競投，二人仲會現身晚會親自交收，確保唔會再有假畫風波。民主黨今年計劃籌300萬，Fred話佢哋一早mark好捐錢爽手嘅「大戶」出席，好似馬時亨雖然人在南美未能赴會，但就一早託阿Fred幫佢競投，星期五大家WhatsApp互相聯絡報價。