林村「誠心鎖願」睇多過買

【明報專訊】每年農曆新年，大埔林村都吸引唔少市民一家大細到許願樹擲寶牒，希望將寶牒掛喺樹上，新年願望就會成真。雖然今年膠桔寶牒加價，由過往20元一份加到今年嘅25元，但依然有好多人光顧。不過，大部分人「命中率」仍然偏低，平均3至4次投擲先至成功。


另外，林村就有新賣點，就係天后廟對開嘅「誠心鎖願」。今年大會喺天后廟對出位置設欄架，名為「誠心鎖願」，畀市民買一對心形木牌後（38元），寫上新年願望，然後綁喺欄架繩上，祈求願望成真。Emily問職員心形木牌銷售情况，職員陳小姐話主要係情侶光顧居多，牌上寫咗一啲恩愛句子，例如「Love U Forever!」


Emily聽聞，大會希望吸引遊人，所以參考歐、日、韓等地大受歡迎嘅心鎖橋而設立「誠心鎖願」。但Emily發現，外國遊客只係觀望為主，大會嘅主意好似行唔通喎。