民主黨I'm Just毛巾熱賣

【明報專訊】年宵市場今晚最後出擊，民主黨受特首梁振英（CY）次女梁齊昕金句「I'm Just齊昕」啟發、創作嘅一系列「I'm Just毛巾」印咗三至四千條，受惠於最近齊昕曝光頻頻，噚日已經賣咗一大半，但由於民主黨設計嘅CY頭像廁紙畀內地扣查，蝕咗本金，佢哋都唔敢放軟手腳，黨員柴文瀚話年宵呢場仗要當半輸咁打，希望可以說服支持者出手重啲，力爭年三十晚清貨。


反觀建制派就無咁緊張，民建聯賣「沙金羊」擺設，年宵檔現貨只有100個，到前日只係賣咗30幾個，民記仲入咗啲暖手包，因為天氣暖賣唔出。至於葉劉淑儀嘅新民黨，就日日下午兩點先開檔，唔通真係唔憂米？


社民連方面，「雨傘運動」主題產品反應唔錯，當中有部分彩色圖案嘅T恤已經賣斷貨。最好笑係漫畫家尊子幫社記畫咗啲揮春，但唔知係咪印得太靚，啲人以為要畀錢，成日都要義工大大聲嗌，先有人嚟攞。


至於泛民年宵龍頭支聯會，副主席蔡耀昌話暫時總收入差過去年少少，只有17萬幾元，賣產品反應較差，反而捐款就多咗。今晚尊子、馬龍會再落場幫市民畫肖像，希望谷谷人氣。