私隱專員公開招聘

【明報專訊】政府早前出咗廣告，公開招聘個人資料私隱專員一職，現任專員蔣任宏有無得續任都係未知之數，但現任未表態話走，政府就出廣告招聘，令人聯想起上年蔣任宏同商務及經濟發展局長蘇錦樑，就住「人對人」直銷電話一事隔空筆戰。噚日蔣任宏出席立法會一會議時，就話自己可能係最後一次去立法會做簡報，唔少議員都讚賞佢工作，並質疑係咪政府內有好多「方丈」，所以令佢無得留任？


公民黨郭家麒讚私隱專員公署喺公布「人對人」直銷電話公眾意見調查後，並無喺政府壓力下屈服，反而擔心商經局長蘇錦樑係招聘專員嘅遴選委員，唔知蘇錦樑會唔會有偏見。


高官唔知乜嘢係「方丈」

工聯會麥美娟質疑，究竟蔣任宏係咪得罪咗「方丈」，所以令政府要公開招聘？蔣任宏就話呢個問題應由政府回應更合適。政制及內地事務局副秘書長梁松泰就一臉無知，話唔知乜嘢係「方丈」，搞到麥美娟要畫公仔畫出腸，解畀佢聽方丈即係指好小器嘅人。


梁松泰強調招聘程序與過去係一致，每次都會做公開招聘，只係過去嘅專員都好少留任喎。蔣任宏同記者講，多謝啲議員讚賞，但佢仲考慮係咪應徵續任，笑言過年有幾日假期，可以畀佢慢慢諗清楚。