「羊」議員教趨吉避凶

【明報專訊】後日就係大年初一，Emily先預祝大家新春吉祥、「洋洋得意」。立法會內都有唔少羊仔羊女，當中包括「體育、演藝、文化及出版界」馬逢國、工聯會鄧家彪，以及民建聯嘅何俊賢同蔣麗芸。不過，今年屬羊嘅朋友被指會犯太歲，唔知議員又有乜嘢趨吉避凶嘅方法呢？


鄧家彪（36歲）話，羊嘅性格和順、好脾氣，希望香港人都可以好似羊咁，少一啲怨氣。佢仲希望今年可以有奇蹟出現，通過政改。佢祝大家健康，亦希望香港嘅管治可以健康啲喎。佢話要趨吉避凶，最好方法就係多啲落區服務市民。


蔣麗芸（60歲）話，最大嘅新年願望就係「好想好想」政改可以通過，佢表明家係一個好好嘅機會政改向前走。Ann姐亦祝大家身體健康，仲話做人只要開心啲、性格樂觀、正面思考，病痛都可以少啲。不過，Ann姐話自己一向都無「攝太歲」習慣，但趨吉避凶方法就好簡單，就係本住良心做人。


漁農界何俊賢（36歲）話自己係漁民出身，所以寧可信其有，平日阿媽會幫佢拋聖杯。至於今年要趨吉避凶，就係去南邊行吓，所以佢新春會去南丫島行一轉，順便見吓漁民。


馬逢國（60歲）就最有霸氣，講到明完全唔信犯太歲嘅事，所以乾脆唔理。