財爺：創業者要同生意談戀愛

【明報專訊】坊間近期對青年創業有唔少討論，財政司長曾俊華又喺網誌撰文分享創業心得。財爺話，青年創業嘅結果係好係壞，好大程度取決於創業者本身，「認真的創業者需要有破釜沉舟的決心，願意與自己的生意談戀愛」。


指「小型貸款計劃」非慈善工作

財爺認為創業者須有充分準備，蒐集相關資料，紮實地做市場分析同研究，將營商嘅每一個環節想通想透，包括賣乜嘢產品或服務？有何賣點？賣畀邊個？售價如何？點樣控制成本？有咩渠道可接觸準買家？有無可靠嘅供應商？能唔能夠請到足夠人手？點樣應對競爭等等。咁樣先能夠增加創業嘅勝算。


財爺提到，按揭證券公司3年前推出嘅「小型貸款計劃」，就係希望協助有充足準備嘅創業者。佢強調有關計劃唔係慈善工作，必須自負盈虧。財爺解釋唔希望大家隨隨便便輕言創業，否則可能浪費大家嘅時間同金錢，「我認為創業的機會，應該留給做好準備的朋友」。