「唔見香港營 只見人紮營」

【明報專訊】自由黨田北俊之前要求特首梁振英（CY）考慮辭職，搞到連全國政協委員都無得做，工聯會榮譽主席陳婉嫻噚日《施政報告》致講議案發言，就小心翼翼咁批評政府。嫻姐點名話勞福局長張建宗當年做港督尤德秘書，可以話係最資深政務官，仲出名手段圓滑，點知張局長入咗現屆政府，好似變咗另一個人咁。原來嫻姐醉翁之意不在酒，轉個頭又為張局長解畫，話「估計都唔係佢（張建宗）嘅問題」，咁唔知問題喺邊？


我哋睇番嫻姐講呢番說話之前講啲乜。佢話，最近有個畫面成日喺腦海出現，就係CY當選嗰陣話，希望香港再無唐營、梁營，只有香港營。嫻姐問，CY當選過咗兩年，「香港營去咗邊……政府總部外就有不少人紮營」。


嫻姐質疑泛民唔理民生去拉布，爭取一套《基本法》以外嘅政改方案，但係中產已對拉布很厭倦，係咪要一拍兩散，同時佢亦批評，撕裂呢個問題唔係單方面可以解決，如果一方走到極端，另一方又跟住走到極端，就解決唔到問題。究竟嫻姐覺得係邊個令張建宗「變身」，相信唔使畫公仔畫出腸，可憐張局長變咗稻草人，真係無辜。