中聯辦提人代政協開兩會減應酬

【明報專訊】一年一度嘅人大及政協兩會將會喺3月舉行，噚日中聯辦主任張曉明同一眾港區人大代表、全國政協委員舉行兩會預備會議，除咗講政改、十三五規劃，本身係政協常委嘅中聯辦副主任殷曉靜噚日特別提醒人代政協開兩會嗰陣，要「全程按時」開會。


以前港區政協開兩會，唔係個個都咁積極投入，遲到、早退都唔少見，但係中央對兩會要求愈來愈高，港區政協亦都乖乖開會，殷曉靜不厭其煩再溫馨提示大家，要全程準時參加會議，唔好遲到早退。政協常委劉漢銓話，即係例如9點開會，有人諗住10點半到，打個白鴿轉就走人，呢種做法就唔得喇，因為開會都係傾國家大事。


除咗準時，殷曉靜又提醒大家開會時要積極，去之前就準備好提案、去到要積極發言，因為意見對國家發展好重要。


另一樣重要提醒，就係到時要減少應酬，佢喺會上話，香港委員可以有酌情處理，但都唔可以應酬得太過分、太亂籠，要適可宜止。