中大商學院增聘25%教授

【明報專訊】中大商學院早排喺《金融時報》全球工商管理碩士課程（MBA）百大排名，繼2013年之後重新上榜排第30位。履新4個月嘅中大商學院長陳家樂噚日同傳媒茶敘提到未來大計，講到學院教學團隊約有130人，未來幾年會有唔少教授退休，加上課程增多需加人手，計劃未來3至5年透過全球招聘，增加25%教授人手，年輕或資深都唔拘。


點樣吸引實力之士加入？本身係中大校友嘅陳家樂同Emily講，中大有歷史口碑同聲譽，加上「香港學術自由度大，不容置疑」，可助教授做更多研究。佢又話學院嚟緊一年會致力加強教學元素、學院國際化及聯繫商界，例如招聘更多外籍教授，強化同社科院、醫學院同法律學院等跨學院合作同研究，等其他學院學生可副修商學院課程。