「I'm just 齊昕」 成雅虎熱搜金句王

【明報專訊】唔少港人都鍾意用雅虎香港（Yahoo）網上搜尋器，噚日佢哋就分析舊年11月到本月初，累計獲網民熱搜最多嘅人物同金句，呢個「十大熱搜時事金句王排行榜」，榜首嘅係近期紅爆嘅特首二女梁齊昕，佢做訪問時一句「I'm just 齊昕」有唔少人都搜尋，遠遠拋離前特首董建華嗰句「貴姓呀，陳生？」，同埋亞視執董葉家寶嘅「香港人唔可以無亞視」。


遠遠拋離「貴姓呀，陳生？」

至於排第四嘅就有緊急應變中心安全主任梁國安喺《東張西望》大叫嗰句「睇住呀！」；然後就係長實集團主席李嘉誠回應會唔會買亞視時，拋下一句「你覺得我好得閒？」相信呢5句說話，有留意開時事嘅讀者都記得。


另一方面，城大噚日亦公布2014年LIVAC泛華地區中文新詞榜，包括香港、北京、台灣同上海嘅泛華地區，最多華文報章提到嘅詞語係「滬港通」，其次就係「太陽花學運」，至於單係香港地區，排第一位嘅就係「雨傘運動」、政改話題當然唔少得，排第二嘅字眼就係「袋住先」。