之鋒獲邀UCLA講雨傘運動

【明報專訊】佔領行動經常被指勾結外國勢力，家學聯、學民思潮嘅學生領導就齊齊獲得「外國勢力」邀請，到歐美出席研討會講解「雨傘運動」。學民召集人黃之鋒會喺下周飛去洛杉磯，出席加州大學洛杉磯分校（UCLA）舉辦嘅研討會；學聯秘書長周永康同副秘書長岑敖暉就會喺月底一齊去瑞士日內瓦，參加人權與民主高峰會。


主要與香港留學生交流

之鋒下星期飛洛杉磯，擔任「香港雨傘運動地區效應」學術研討會嘅主講嘉賓。之鋒同Emily講，今次去加州係與當地嘅香港留學生見面交流，強調美國任何學校，包括將會去嘅加州大學洛杉磯分校都無畀獎學金佢，表明去外國學校讀書，「這些機會不屬於我」。


之鋒：民建聯都去外國考察

之鋒話唔擔心被批評係勾結外國勢力，因為佢唔會見當地官員，而且只有約一星期交流時間，點樣勾結外國勢力。雖然之鋒表明唔會見官，但如果有美國官員「咁啱路過」想見佢，之鋒話都可以交流。不過，之鋒反問民建聯都去外國考察交流啦，點解佢唔得？佢話機票住宿等都係對方支付。