安永員工登廣告批上司

【明報專訊】四大會計師事務所之一嘅安永，一班現職和離職員工夾錢喺報章登廣告，批評一名姓何嘅女上司管理混亂、分黨分派，搞辦公室政治。Emily向一名曾經喺安永工作嘅會計師朋友打聽，原來廣告背後有段古，事關安永近年請咗有美國背景嘅安達信會計師事務所嘅人過嚟香港管理安永，管理權逐漸落入美國管理層手中，公司內漸漸出現分黨分派。


安永員工廣告噚日出街後，引起會計界議論紛紛，有關員工喺廣告仲話問題已經好嚴重，叫管理層唔好再視若無睹，個廣告喺facebook不斷畀人share。


安永：公司以人為本

一名已經離開安永嘅朋友同Emily慨嘆「做乜搞成咁？」，佢話近年安永有啲老臣子離開咗，安永於是請咗安達信會計師事務所嘅人來港管理安永，員工廣告點名批評嘅何姓女上司，聽聞佢和外籍上司關係較好，但同本地員工關係就唔係咁好，有啲人唔認同何小姐嘅管理手法，就夾錢登廣告表達不滿。


安永發言人回覆Emily，話公司向來以人為本，非常重視及鼓勵員工溝通，會深入了解事件，釋除員工疑慮。