獲嘉許公僕﹕感恩入政府 生活溫飽

【明報專訊】噚日政府舉行「公務員事務局局長嘉許狀頒發典禮」，今年表揚81人，包括3名服務超過30年，分別嚟自消防處、衛生署及機電工程署嘅公務員，佢哋噚日就同傳媒分享佢哋救火救人嘅故事。不過，當記者問起點樣評價特首梁振英（CY）嘅領導表現、公務員團隊目前嘅士氣時，3人都三緘其口。


雖然3人無評論CY，但都有人分享加入政府嘅感受。喺政府任職超過43年嘅機電工程署管理值班工程師方武就話好感恩可以加入政府，因為加入機電署後唔止識咗老婆、生咗個乖女，仲可以供埋細妹去外國讀書，成家生活上可以溫飽。


另一獲嘉許、喺消防處任職超過35年嘅消防總隊目梁志義，雖然無評價「熱廚房」，但就講到年輕時喺火場與死神擦身而過嘅經歷。佢話因為年輕時衝動，想走前一啲，有次喺木屋救火時「懶叻」行前，點知遇着燒石油氣，迎面被一股氣流吹倒，好彩都係「八月十五」痛咗10幾日，保得住命仔。


任職超過34年嘅衛生署病房經理袁敏霜，就憶述2003年SARS時嘅工作情况，佢記得當時喺瑪麗醫院加護病房工作，有唔少同事都主動要求留喺前線，照顧SARS病人，令佢覺得好感動。