女子冰球隊新年出戰

【明報專訊】冰球運動喺香港雖然冷門，但都有一班狂熱分子，合和實業太子爺胡文新就係其中一個，身兼國際冰球聯合會（IIHF）副會長嘅佢，之前成功爭取香港首次成為「國際冰球聯合會女子組世界冰球錦標賽」其中一個資格賽嘅主辦城市，農曆新年間仲喺九龍灣商場MegaBox搞比賽。


胡文新話，香港愈嚟愈多溜冰場建成同冰球界多年嚟嘅推廣，全港玩冰球嘅人已經由2007年嘅700幾人，倍增到超過1300人，但當中只有約100名女球手，所以今次爭取做主辦城市，除咗方便港隊出戰，亦希望令更多人接觸冰球運動，同吸引多啲女性參加。今次賽事除咗港隊，仲有來自南非、土耳其同保加利亞嘅隊伍，比賽會喺今個月18號（年三十）、19號（大年初一）同21號（大年初三）嘅下午3點同6點半舉行，港隊首次上場係18號6點半，大家記住去支持喇！