消費新聞港人最緊張肚皮

【明報專訊】去年台灣「地溝油」、麥當勞疑售過期肉搞到大家「食唔安坐唔樂」，消費者委員會同新聞機構，上月14日至本月3日舉辦「馬年十大消費新聞」投票，有2858名市民投票，結果發現市民最關注食物安全新聞，排頭位係「台灣強冠地溝油風波 本港數百食肆中招」，有2700票。排第二係有2689票嘅「上海福喜黑心食材 麥當勞停售部分食品」。


消委主席促檢討食安條例

消委會主席黃玉山話投票結果反映港人好關注食物安全，叫政府檢討《食物安全條例》，制訂內部指引，定發布食品問題資料時間、提高罰則等，等市民食得安心。


市民對於美容亦好關注，「美容院麻醉藥超標 300磅女抽脂送命」排第三（2186票），第四位係「iPhone 6推出掀炒風」，其他獲選新聞包括「電訊商合併加價潮」、「消委會報告批評一手樓住宅銷售手法 提8項建議」、「郵輪改行程 團友霸船索償」等。


另外，由《文匯報》同多間傳媒機構舉辦嘅「2014香港特區政府施政十件大事」評選噚日亦公布結果，主辦單位話共收到全港市民13萬張選票，選出首3位大事分別係「政府追查劉進圖遇襲案確保新聞自由」、「香港發生非法『佔中』 政府妥善處理事件」、「『滬港通』於11月17日正式開通」。主辦單位起嘅選題，大家係咪認同就見仁見智，而文匯報董事長、社長王樹成話，投票結果反映某啲措施或者有爭議，但相信終有一日市民會睇到特區政府今天嘅遠見卓識。