私隱專員8月任滿 公開招聘

【明報專訊】個人資料私隱專員公署噚日宣布，現任私隱專員蔣任宏喺今年8月3日任期屆滿，所以要開始公開招聘專員，講明人選唔單止要有10年公共行政管理經驗，仲要有「清晰遠見、持正不阿、具出色的領導才能」等等，薪酬每月逾20萬元；行政會議成員陳智思會擔任一個5人遴選委員會嘅主席，向特首梁振英建議最適合人選。


Emily見截止申請日期為3月4日，即係公開招聘期唔夠一個月，招聘廣告講明申請人要係香港永久居民，有良好教育水平，最少10年公共行政、專業服務或私營機構高層管理經驗等，最好熟悉埋與私隱有關嘅科技發展、社區經驗同法律背景，要求都幾高㗎。


現任專員蔣任宏喺2010年上任，任期5年，所以8月就退位。近年最令Emily記得蔣專員嘅，係佢上年建議規管真人直銷電話，畀商經局話佢無先「打聲招呼」。值得一提係今次商經局長蘇錦樑係遴選委員會委員之一。