長毛話「對嘴」 梁美芬喊「啋！」

【明報專訊】立法會資訊科技及廣播事務委員會噚日討論亞洲電視續牌問題，原來經民聯梁美芬係亞視忠實觀眾，喺會上數晒亞視節目咁滯，話佢哋搞《亞視我們這一家》等節目好有創意，仲話亞視員工上下堅守崗位十分專業。但佢嘅發言就惹來「長毛」梁國雄同佢「對嘴」，話梁美芬侮辱亞視員工。


梁美芬喺會度話自己有份做《感動香港》評判，見到亞視員工冇出糧仍堅守崗位，仲咁有創意推出唔同節目「救亡」，覺得佢哋好專業，叫大家唔好喺佢哋傷口上灑鹽。


坐喺梁美芬後面嘅長毛聽到好唔滿意，話「亞視仲有咩創作？係不停地咁播舊節目，係『再創作』」，呢個時候梁美芬就質疑佢話「咁你有冇睇過亞視這一家？」長毛就叫梁美芬唔好侮辱亞視員工，「有創作力嘅人都唔會留喺一間冇創作節目嘅公司啦，係搵唔到食咋！」

長毛：你唔讚王維基？

長毛話港視王維基有好多創意節目，但冇地方播，「你又唔讚吓王維基？佢哋創作冇地方播，被人扼殺創意」，講到激氣仲話，「我都唔想同你對嘴」。梁美芬即刻回應「吓！對嘴？我啋！」見到兩個議員「打情罵俏」，在場嘅議員同埋商經局長蘇錦樑都忍不住笑出嚟。


不過，兩人拗到開完會都仲拗緊，梁美芬離開會議廳前仲拋低一句，「你有冇睇過余安安嗰套《彩雲深處》呀？」，果然係亞視/麗的嘅忠實fans，連上世紀80年代初嘅舊劇都講得出。