葉劉否認捧陳岳鵬選立會

【明報專訊】有報道話新民黨主席葉劉淑儀有意「力捧」昔日愛將、政制及內地事務局政治助理陳岳鵬選立法會議員，仲話葉太會考慮喺下屆立法會選舉嘅名單中排第二，為陳岳鵬「抬轎」。葉太噚日喺facebook澄清，消息絕無事實根據，話如果真係有機會，機會都會先畀黨員同支持佢嘅朋友，而唔會畀一個「遇到機會即選擇『上位』跳船離巢的人」，話咁做嘅話點對得住戰友。


陳岳鵬就回應話，從未有同葉太討論選舉嘅事，目前只想專注喺政改嘅工作，暫無意離開現屆政府。


葉太話，由成立匯賢智庫到創立新民黨，全靠黨員同各方好友努力，特別係一批無懼失敗同艱辛嘅年輕人。


葉太話，佢哋唔係名校出身、亦無顯赫背景，但都願意加入新民黨由低做起。葉太感謝佢哋多年來一齊打拼、歷盡辛酸，「我的從政之路即使荊棘滿途，卻從未感到半點孤單」。