新聞類別
副刊
詳情#
【明報專訊】「今個星期六係二月十四日，有咩搞吖？」
「咪同平時一樣，湊阿仔去補習、學琴同練水囉！」
「吓，嗰日情人節喎，你哋無諗過同老公慶祝咩？」
Happy Mama最近同成班媽咪friend high tea，原本打算八吓佢哋點同老公慶祝情人節偷吓師，點知個個聽到「情人節」三個字，腦入面就只係諗緊幾點要接阿仔、夠唔夠時間溫默書甚至要準備定三月升中面試特訓……完全冇諗過要抽番少少時間陪老公。
多表達感謝 相處更融洽
Happy Mama同香港基督教服務處Pario親職服務的服務主任兼註冊社工廖李耀群傾過，佢話見過唔少夫婦生完細路後，成副心機放晒落小朋友度。夫妻間的話題總係離不開湊仔，變得好少時間去關心對方。佢認為咁嘅情况並不健康，因為一個家庭的基石就建立在堅厚的夫妻關係上，夫妻關係和順亦會為孩子增加不少安全感。如果夫妻間平日好少「拍拖」，大家嘅角色除咗係為人父母，亦係人家嘅老公、老婆，唔努力維繫，只會令彼此變得疏離。
廖太建議，夫婦生完細路後都要留時間畀自己同另一伴過吓「二人世界」。有時又可以互送小禮物，或者寫張小字條同對方講吓心底話，畀對方知道自己緊張佢。夫妻間相處難免有拗撬，但如果多啲用欣賞嘅心態去相處，多啲講感謝對方的說話，兩人的相處一定更融洽。
夫妻之間的關係就好似一盆花咁，要不時淋吓水、施吓肥才可以茁壯成長。仲有幾日就到情人節，Happy Mama都要積極籌備節目，同老公過吓溫馨浪漫嘅二人世界。
文﹕Happy Mama
留言 (0)
