黃錦星建橋跌落水

【明報專訊】為內地農村籌款修橋建路嘅「無止橋慈善基金」，噚日舉辦第四屆無止行慈善步行籌款活動。今次有13間本地大專院校近600名師生校友同市民力量，籌募近70萬善款，用於建設甘肅省馬岔村嘅村民活動中心。


「無止行」籌70萬善款

環境局長黃錦星同中大校長沈祖堯都有參加活動，原來黃錦星係無止橋榮譽顧問，佢曾經與一眾中大師生去甘肅毛寺村為當地村民築橋。當年為咗建橋，佢同10多人做先頭部隊探路調研，點知發生咗一件趣事。局長話由於當地起嘅都係獨木橋，建築簡陋，佢企喺橋上，一個唔小心就掉落水，十分狼狽。


沈校長兩年前都去過甘肅建橋，佢話當時落雨，建橋時亦要經常「落水」。有次見到多個中大生搬木頭，佢走去幫手，點知學生太信賴校長嘅能力，真係放手由校長去搬，但啲木頭原來非常重，搞到校長差啲整跌啲木頭。