民主黨黨慶盼籌300萬

【明報專訊】民主黨今個月27號舉行20周年黨慶兼籌款晚宴，記得前年搞時，政務司長林鄭月娥、財政司長曾俊華等高官都畀面到賀，但今年就傳出梁班子會杯葛，不過籌款委員會主席李華明（Fred）就話無因此調低籌款目標，繼續係300萬元。佢直言官員到場都幫唔到佢哋籌款，唔嚟都唔會好大影響，反而唔少地產商代表都買咗枱，包括新世界、恒地同新鴻基。


Fred話記得前年10月搞黨慶，有成64個高官出席，今次最終有幾多人出席，大家到時就會知，但唔少人都依舊支持民主黨，好似前政務司長唐英年一早應承捐紅酒；恒地執行董事黃浩明亦會捐出一箱12支Petrus紅酒拍賣。


唐唐捐酒 田少表明到場

Fred話黨慶將會筵開50圍，較前年少，原因係唔想啲枱太迫喎。而「暢所欲言」嘅自由黨田北俊表明會到場，Fred仲話唔少自由黨中人都應承出席。


記得當年黨慶鬧出賣假畫風波，Fred話今年就有本地畫家Pat Steward捐出名畫，而且佢本人當晚亦會出席黨慶，所以拍賣嘅絕對係真迹。


行政長官梁振英出席一個義工活動啟動禮，未有回應記者提問佢係咪唔出席民主黨黨慶。