觸木﹕入實現室撳實現掣

【明報專訊】談了兩期木材和新事物的混搭，今回再下一城（其實是再扯遠點，因今期受訪單位何止玩木），介紹一個人人期望可達到的工作室——「LAAB實現室」。


雖然這個工作室和膾炙人口的叮噹無關，而是非一般的建築師事務所，但透過他們幾位成員不同的專業背景，一直成功地把不同客戶的想法，無論建築、藝術、家具、室內設計和展覽設計等，甚至哪怕客戶只有一個概念而無實際的完成方法，他們也能將之實現，絕對無愧「實現室」之名。


LAAB 建築奇才組合

認識今期的受訪者Ricci（黃卓健）已很多年，因他是我中學和大學時的師弟，只是一直沒有熟稔，後來輾轉在不同場合碰上，得知他藝術系畢業後到了港大修讀建築，然後成立了自己的公司，接着工作室更開設在火炭，和小弟的工作室在同一座工業大廈，並時常在食堂遇到，今次終於能正式和他談談其經歷和想法。


他們仨 創作者聯盟

「LAAB家主要有三個co-founder，阿亨（葉晉亨）係小學同學，小學後一直無見過，後來喺羅馬嘅許願池旁邊遇番，佢嗰時已經係建築師，而Otto（吳鎮麟）係港大讀建築時嘅師弟，但係唔熟，後來佢喺MIT返嚟後，有啲job開始合作。」Ricci輕描淡寫道出一段微妙的機緣巧合，卻成就了意義非凡的合作，因三人其實合作前早已獨當一面——阿亨於加州大學伯克利分校及港大修讀建築，2012年參展威尼斯建築雙年展，入圍「香港青年建築師獎」、Otto在美國麻省理工學院就讀建築時曾獲全額獎學金及其他重要獎項、Ricci則擁有中大藝術學士、港大建築學士及碩士學位，並於畢業後已創立名為Art Lab的創作公司，建立了一定數量的客戶，在基礎上加上強勁組合，終於在2013年成為「LAAB實現室」，齊集各人擅長的不同範疇後，猶如漫畫中的super heroes團隊，只是目標不為打倒外星人，而是接觸到更多不同的客戶、完成更多不可能的任務。


從 2A 「扭啲得意嘢出嚟」

「LAAB最重要嘅係兩個A字——Art同Architecture，藝術元素同建築加起嚟，雖然香港起樓無咩發揮，但可以響其他地方玩到好多嘢，例如我哋好鍾意玩物料，試好多可能性，就算好普通嘅物料，好似木夾板，我哋用CNC（Computer numerical control電腦控制機牀）囉啲深淺唔同嘅紋，露番入面啲texture出嚟，甚至同台灣供應商傾緊tailor-made想要嘅夾板；又試過幫個客響櫃嘅趟門上，用HDF（high density fiberboard高纖板）囉啲湖水pattern出嚟，或者係室內設計上，我哋會嘗試喺建築概念同空間感覺玩，總之想扭啲得意嘢出嚟，唔係一般家居雜誌上見慣嗰種……」Ricci一邊說一邊仍流露出興奮的神情，可見每個項目在他們心目中絕對不止是一單生意，而是一個個發掘和探索的實驗，難怪他笑說不少客人都因他們的有趣而來，有時為了幫個客整靚件事，更是連蝕本也在所不惜。


邊做邊學 鑊鑊新鮮鑊鑊金

和Ricci談到由藝術轉修建築和成立公司的經過，與吸收新知識不無關係：「藝術系畢業後做過一年畫室嘅工作，成日去中央圖書館搵資料，睇睇吓有次睇到一個運河嘅設計（位於英國的The Falkirk Wheel Canal lift），好似部比船搭嘅摩天輪，解決咗河道高低落差嘅問題，睇完覺得好震撼，發覺設計可以咁玩法，就想去讀設計，後來同啲師兄傾傾吓報咗HKU建築，初時諗住唔得㗎……後來讀完開公司做contractor，一邊儲錢，買咗部二手CNC，幫artist做作品開始邊做邊學，慢慢捱到家……」正是寓學習於工作的精神，在LAAB內既沒有上司和下屬的階級觀念，也沒有駕輕就熟的工作，有的是互相學習砥礪，和「鑊鑊新鮮鑊鑊金」的挑戰﹕「有次響佐敦一座商業大廈lobby嘅設計搵我哋做，8呎高10米長嘅牆上面要裝上唔同角度細細件嘅透明acrylic，有啲仲要發光砌番個名出嚟，籌備時間又急又要準繩度高，於是我哋做咗個掛嘅panel system，acrylic就自己噴沙打沙，結果一晚裝好，簡直係壯舉，當中學到好多嘢……」

後記﹕入實驗室做瘋狂博士

小時候看卡通片，總有些瘋狂博士之類的角色，時常躲在實驗室內進行各種實驗，然後經歷無數次失敗的意外爆炸後，終成功發明了一些厲害東西。訪問Ricci的時候，腦海中一直出現這個畫面，加上自己從事藝術創作，多是一人方式進行，對於他能夠和志同道合的奇人異士一起創作、實驗和克服每個挑戰，實在好生羨慕；尤其香港的現實環境，愈來愈多不同形式的掣肘，實現室能夠在物料、場地、預算、時間、人手等，各種狹縫之中堅持開闢創意的蹊徑，絕對不容易，但同時也是一支強心針，證明只有創意、決心和毅力，仍然可以實現自己的想法，正在閱讀本文的你，又會否有什麼想去實現呢？


LAAB：www.laab.pro

咩叫囉機？

CNC的機頭其實是部「囉機」（router），師傅都叫router做「囉機」，也有人寫「鑼機」，其實是類似鑽嘴狀的頭一邊高速旋轉一邊移動產生刮痕、修邊、甚至切割的功能，該動作就會叫「囉」，例如「囉」條坑出嚟，「囉」啲紋上去等等，是廣東話特有的，無正確寫法而只有發音。


欄目簡介

英文「Touch Wood」，有驅散噩運的意思，有說和廣東話的「大吉利是」意思相近。無論如何，木頭和人類的關係可說是唇齒相依，由原始人鑽木取火，到用木搭建房屋，利用木筏渡河，製作家具，及至各種藝術設計等，木都是不可或缺的材料，故此本欄目命名為「觸木 Touch Wood」，正希望把一些和木有關的人、事和地方，以至簡單的DIY創作和各位讀者分享。


作者簡介

王天仁，畢業於香港中文大學藝術系，以回收木卡板創作卡通動物雕塑超過十年，活躍於不同類型展覽、跨界合作和項目策劃，亦積極擔任教育工作，近來透過不同平台，以文字分享所見所想。


www.facebook.com/junkwoodsculpture

文/ 天仁

圖/ 天仁、受訪者提供

編輯/蔡曉彤

fb﹕http://www.facebook.com/SundayMingpao