老婆係老虎 曾鈺成自認小豬

【明報專訊】平時聽立法會主席曾鈺成論政比較多，但佢喺香港樹仁大學《仁聞報》訪問中就講多咗私人嘢，提到夫妻關係時，佢話辦公室掛咗幅「老虎畫像」，係因為太太係隻「老虎」，佢又指住前面擺放嘅小豬陶瓷，話呢個就係佢。佢承認自己唔係甜蜜嘅人，情人節都只係食餐飯，送花呢？佢話太太可能會話佢「發神經」喎。


遲來的選民緣？

曾鈺成又提到自己成日講錯嘢撞板，最大弱點係脾氣好大，當記者問咗啲挑釁而水平唔高嘅問題時，佢會好嬲，令到記者覺得佢好「串」。曾鈺成喺訪問中，大談自己2016年會退休唔再選立法會，2017年都唔會選特首，因為已經「遲了」。點解「遲了」？佢解釋話﹕「如果早10年、20年已有今日嘅選民緣，可能會去選。」佢話老咗，學習能力倒退，但亦好有自信咁話，雖然特首成日畀人鬧，但「你做被人罵，我做就未必被人罵」。


佢又以「漸入化境」總結自己嘅政治生涯，「能做到不介懷一時得失，係維持心境平衡和面對新問題嘅重要基礎」，所以佢「阿Q」地諗，唔選特首，可以留低好嘅幻想。退休後，佢希望可以有人搵佢做清談節目。