袁國強勉青年「靠自己」

【明報專訊】律政司長袁國強噚日去深水埗參觀活化之後嘅美荷樓，屋邨仔出身嘅袁國強仲同中學生分享奮鬥經歷，佢話青少年始終要為自己嘅生活負責，因為政府可以做嘅嘢好有限，好似佢哋嗰個年代，雖然生活好差，但大家都努力解決自己嘅問題，呢樣就係香港精神喇。


屋邨仔踢波 隔籬有人「劈友」

袁國強認為政府雖然有責任為市民提供好嘅環境，但冇可能解決晒所有問題，始終要靠自己。佢喺黃大仙上邨長大，屋企經濟唔好，入到香港大學時本來可以申請學生資助或者貸款，佢爸爸都叫佢唔好申請，要將啲資源留畀更加有需要嘅人，佢大學嗰陣要幫人補習同教夜校嚟掙錢。


當年住得屋邨，生活環境多數唔算好，袁國強話細個喺屋邨樓下踢波，隔籬就有黑社會「劈友」。雖然佢家係資深大律師兼司長，但中學成績絕對唔可以用「好」嚟形容，分科時成績唔夠入理科，唯有讀文科，「嗰個年代男仔讀文科被認為係loser（失敗者）㗎」。


中學成績麻麻 大學頂硬上

至中六、中七成績好轉，袁國強最後入到港大法律系，開學前佢仲好囂，開學後先發覺大件事。袁國強憶述，「翻開本法律書，每個英文字我都識，但成句說話我讀10次都理解唔到，似係莎士比亞嗰啲古典英文」，但因為對法律仲有興趣，唯有頂硬上。