想30歲阿仔入青少年軍 張華峰﹕有冇限體重？

【明報專訊】香港青少年軍總會嘅成立令唔少人質疑係為咗「洗腦」、「愛國教育」，噚日立法會教育界議員葉建源就喺大會提出關於青少年軍嘅質詢。唔知係咪因為想緩和吓氣氛，身形有番咁上下嘅經民聯立法會議員張華峰，竟然問加入青少年軍有無體重限制，唔少議員聽到都笑出聲。


張華峰事後解釋係幫個仔問，因為佢想個仔參加，順便減磅，「佢同我身形差唔多，200幾磅」，仔仔今年幾歲呀？張華峰話﹕「30歲。」30歲都叫青少年？張華峰話﹕「得，緊係得啦！」


民政事務局長曾德成會上回應話，自己只係「青少年軍」榮譽顧問，唔清楚「青少年軍」嘅實際運作、喺邊方面發展，以及有冇體重限制，建議張華峰向總會查詢咁話。