張炳良﹕做足5年要感謝神

【明報專訊】樓價愈升愈癲，負責房屋政策嘅運房局長張炳良，噚日出席青協活動同200幾名青年對話。5歲小朋友都擔心無地起屋，學生就更緊張問住屋問題，張炳良話舊年全港樓價整體上升咗13%，升幅明顯，但倫敦、悉尼等外國都市嘅樓價亦都上升14%，證明問題唔係香港獨有。


港樓價升13% 悉尼升14%

張炳良承認，如果中產階層都覺得買唔到樓，對社會已經係警號，形容政府面對樓市供求失衡問題頭痛，「一步一驚心」，但佢希望公眾明白房屋供應政府係無神仙棒，唔係「一變就有」，當下要先穩定市場，實施需求管理措施，長遠始終需要增加土地供應。佢又話政府會認真研究係咪容許未補地價嘅居屋分租，但問題非常複雜，包括點樣處理租金收入，以及會唔會因此出現劏房等。


除咗住屋，亦有青年問張炳良會唔會參選下屆特首，張炳良就話目前好專心，目標係完成5年任期，喺運房局做到2017年6月，又話自己作為問責局長，「第一日返工就預備落台」，做足5年已經好感謝上帝，其他事暫時唔會去諗。