部分泛民未定去唔去

【明報專訊】中聯辦酒會今日傍晚喺會展舉行，但撞正立法會大會，相信唔少議員都幾頭痕。15個泛民都收到邀請，但真係出席嘅應該唔多，只得公民黨郭榮鏗、湯家驊同民主黨單仲偕話明會去。


至於部分無政黨泛民，似乎對酒會反應冷淡，資訊科技界莫乃光就表明唔去，因為要準備喺議會內提動議；會計界梁繼昌、教育界葉建源都話未諗定去唔去。


梁繼昌話其實酒會都係可去可唔去，佢自己未決定，等今日開會時再決定喎，佢話即使出席酒會，遞信呢啲行為都係留番畀其他同事做喇。


葉建源就話上年都有出席酒會，唔覺得出席有乜嘢問題，但呢排好多事要處理，一直未決定係咪去酒會。


至於建制派，民建聯主席譚耀宗就擔心，如果一下子好多議員去晒酒會，有人故意點算人數就比較麻煩，所以都提醒咗大家留意，但就無特別「編更」點樣分批出席及留守立法會。