郭榮鏗：謙卑唔係佢強項

【明報專訊】公民黨湯家驊（Ronny）早前接受無綫《講清講楚》訪問時慨嘆，民主派無人有政治智慧，總係將自己逼去牆角。噚日Ronny黨友郭榮鏗（Dennis）接受民主黨劉慧卿訪問時，就話「謙卑唔係湯家驊嘅強項」，講笑話自己係一個後輩，無資格去批評其他人有無政治智慧，亦唔敢講自己有無政治智慧。


Dennis喺卿姐節目《議會內外》，被問到咩叫政治智慧、自己有無政治智慧，Dennis笑笑口話「咁高深嘅事要問湯家驊」。Dennis話，無資格去評論其他人，因為好多政界前輩都經驗豐富。


對於被自己友批評無政治智慧，卿姐就話一定尊重其他人嘅意見，但表明「我唔會人身攻擊」。卿姐仲話，好歡迎Ronny去民主黨交流，分享意見。


另外，近日一批年輕法律界人士組成一個新嘅議政團體「法政匯思」，Dennis就話，以前法律界人士都會期望由大律師公會及律師會代表業界發聲；不過，佢相信律師會喺政改立場上比較保守，而大律師公會喺個別議題上都傾向保守，所以一班年輕律師希望有個平台發聲，但相信唔係要「打對台」。