情人節結婚跌六成

【明報專訊】就嚟情人節，入境處話今年有207對新人交咗擬結婚通知書，打算喺2月14號結婚，比去年2014年「好年」嘅526對跌咗六成。今年打算喺情人節結婚嘅207對新人當中，有六成半，即係134對，選擇由婚姻監禮人主持婚禮，有56對選擇喺婚姻登記處註冊，只有17對喺特許禮拜場所，即係好似教堂等宗教場所結婚。


舊年情人節撞正元宵佳節，19年一遇，加上雙春兼閏月，好多新人拉埋天窗。今年情人節雖然無舊年咁多人結婚，但都多過2013年同2012年。本身係婚姻監禮人嘅律師鄭家富話，今年生意少過舊年一半，原因係今年2月14號係農曆新年前最後一個周末，好多人都要食團年飯。唔少新人會驚親友要團年，嚟唔到飲自己嗰餐，又或者因為酒樓要做團年飯生意book唔到場，所以少咗人結婚。鄭家富仲話，2010年情人節撞正大年初一，嗰年仲少生意咁話。


自2006年起，入境處開放畀新人選擇喺任何地方，喺婚姻監禮人主持下舉行婚禮，睇番入境處數字，呢兩年選擇呢種方式喺情人節結婚嘅新人，已經多過喺婚姻登記處註冊嘅人。鄭家富話，近年都唔少人請律師去酒樓或者酒店註冊，貪佢夠晒方便。無論點都好，能夠有情人終成眷屬都係開心嘅事，Emily喺度恭喜咁多對新人。